萬般的蠢事

喺我仲好細個嗰陣, 好多時都係自己同自己玩, 媽咪通常都會放我喺張長櫈上面,然後入廚房做野。我就自己玩煮飯仔, 其中我有兩個公仔, 一男一女, 男嘅係塑膠造嘅,攃落去會有BB聲嗰種, 女嘅係小紅帽造型, 一直我都玩得好地地,但係有一次, 我依舊攞住兩隻公仔喺度玩, 煮野俾佢地食, 玩玩吓,我見到隻小紅帽竟然自己郁, 我以為錯覺, 再望真D, 佢仲擰轉頭望我, 我即刻嚇到自己爬落地下, 走去廚房同媽咪講: "媽咪, 隻公仔自己郁呀, 你快D睇吓啦!" 媽咪以為我想同佢玩, 佢就走出廳,攞住兩隻公仔, 同我講: "你攞住佢地咪識郁LO, 佢地肚餓啦, 你煮咩俾佢地食呀?" 跟住自己就走番入廚房 : 可憐嘅我呆咗喺度, 唔知點算好......我唔敢再玩落去, 因為好驚隻小紅帽, 所以一直企喺廚房門口等媽咪做完野。

媽咪之後叫的執好D玩具,放番喺個桶到, 但我唔敢行埋去, 媽咪以為我懶, 所以話同我一齊執。我見有媽咪喺度, 所以最後都執埋一份, 但係就死都唔敢掂個小紅帽(由媽咪親自郁手執),由呢次開始, 以後我玩親煮飯仔, 就只玩男嘅硬膠公仔, 唔再攞小紅帽一齊玩。有時爸爸媽媽會問:"點解唔侵小紅帽玩呀?" 跟住就攞出嚟俾我(多得佢地唔少:  ), 我次次都好反感, 佢地一遞俾我, 我就會話:"我唔要呀!!拎走佢呀!" 跟住就會丟佢落地, 或者丟得好遠, 久而久之,我阿爸阿媽就以為我偏心, 淨係鍾意男仔, 唔鍾意女仔, 有時會問我點解咁偏心, 我就忍唔住指住小紅帽話:"佢會郁架"。但係我點講, 我父母都唔明, 所以如果佢地攞住小紅帽同我玩, 我會不斷好粗暴咁對待小紅帽, 例如:打佢,丟佢,用其他公仔毆打佢.....

最後, 我父母見我咁嘅反應, 唔肯同小紅帽玩, 所以清玩具嗰陣, 當佢係多餘嘅玩具丟咗......多得呢隻咁嘅小紅帽, 攪到我對D人型公仔有強烈介心同陰影  , 我從此之後就無任何人型公仔玩具, 就連所有女孩子必玩嘅Babbie公仔, 直頭喺我整個成長過程中絕緣   ......直到而家為止, 我都仲係好討厭d人型公仔。

ThE_Off

真係你自己既故事阿???