[Open]
[Close]
老公買的外賣
陳先生每日都要好夜先收得工，所以佢每晚都唔可以陪老婆食晚飯。不過，陳先生好錫老婆，佢知道老婆好鍾意食屋企附近果間「X記」ge粉麵，所以佢每晚收工都會去X記買碗麵俾老婆做宵夜。
有一晚，陳先生如常收工後買麵返屋企，佢將碗麵放响枱之後就去咗沖涼。之後，陳太太亦一如過往，一路食宵夜，一路睇電視。
响陳太太食完宵夜後無耐，有一位男士打電話俾陳太太，問陳太太識唔識陳XX(註﹕陳先生ge全名)。陳太太就話﹕「陳XX係我老公，你做乜事咁夜打電話嚟?」呢個人就話﹕「我地係警察，陳XX遇到交通意外，唔該你而家即刻嚟XX醫院。」
陳太太當時嬲到不得了，因為呢條友實在太過份，半夜三更玩電話不特止，仲咒人添。所以陳太太就好惡咁鬧佢，然後收線。
之後呢個人即刻再來電，陳太太就好惡咁鬧佢，叫佢唔好再玩電話。跟住呢個人就話佢唔係玩電話，陳先生真係遇倒交通意外仲即場死亡。陳太太就好惡咁同呢個人講﹕「我先生啱啱先買埋宵夜返屋企，果碗宵夜我都食完添啦，佢又點會遇倒交通意外兼死埋呀???!!! 」跟手陳太太就收線。
之後陳太太就大叫﹕「老公出嚟吖!」但叫咗好多聲陳先生都無現身。跟手陳太太就去浴室 ---> 睡房搵陳先生，但都唔見陳先生。陳太太認定陳先生响自己唔為意ge時候落咗街。
過咗無耐之後，有人按門鐘。陳太太以為陳先生唔記得帶鎖匙，所以即刻開門俾佢。點知一開門見倒ge唔係陳先生，而係一d三唔識七ge人。
陳太太問呢兩個人搵邊個，其中一位男士就話自己係警察(註﹕有出示委任證)，先前打過電話嚟通知陳XX ge屋企人陳XX出咗事，不過陳XX ge 屋企人唔信，所以專誠上門帶陳XX ge屋企人去XX醫院。
陳太太當時好嬲，佢即刻同呢兩個自稱係警察ge男士講﹕「我老公啱啱買俾我做宵夜果碗麵都仲放响枱面，佢點會遇到交通意外死咗呀?」跟手陳太太就放呢兩位男士入屋，當時枱面上確實放咗一碗已經食完但仲有少少暖ge外賣麵。陳太太跟住仲話﹕「我老公放低碗麵就入咗去沖涼。」陳太太仲帶埋呢兩位男士入去浴室，但當時浴室乾爽無比，跟本唔似早前有人用過。
之後其中一個自稱係警察ge人士就叫陳太太攞陳先生個身份證出嚟俾佢地睇吓，以便確定係咪「同名同姓」之誤。但陳太太搵極都搵唔倒陳先生ge公事包，之後陳太太就應邀去咗XX醫院，結果陳太太見倒已經過咗身ge陳先生.......根據醫院紀錄，陳先生到達醫院前已經死亡，死亡時間係晚上11點幾，而陳太太食宵夜時係睇緊「最後新聞」，換言之，陳太太食宵夜時陳先生已經不在人世.......................
到底碗外賣麵係點樣嚟架呢????? 呢件事係陳太太四出求助時所講ge版本，因為佢完全無辦法理解到底發生緊乜野事，所以佢就周圍搵人幫忙，希望可以知多一點點。
後話﹕
負責呢單案件ge差佬打過電話去電台節目講呢單野，佢話當時真係有一碗外賣响枱面。有人認為，其實買外賣ge係陳太太自己，陳太太可能一早已經收倒其他人通知自己ge老公出咗事，但佢一時接受唔倒老公突然去世，所以潛意識引導自己做咗一d老公常做ge野(即﹕買外賣)，仲當正係老公做ge。
